العملاء الخونة

واضح كدة ان الناس كلها عايزة توصل معلومة ان دومة و علاء و محمد عادل و ... عملاء و قابضين و متدربين في صربيا و الهري ده ... طيب خدوا بالكوا ان 6 ابريل بيتوجهلها تهمة العمالة دي من 3 سنين و مفيش قضية واحدة اتحكم فيها ﻷن كل الناس الي بتهري دي مستنداتهم عبارة عن ورق جرايد .. ثاني حاجة .. لما ييجي بقي يتحكم عليهم .. يتحكم عليهم بتهمة تنظيم مظاهرات !!؟؟ ( كلهم ما عدا علاء ) . ده يبقي اسمه ايه يعني !؟ 
لو عايز تعرف دولتك اد ايه بتحترم القانون تابع القضايا الي متهم فيها ظباط.. شوف اللعب و تغيير مواعيد الجلسات من غير اخطار المحامين و الاحكام الهابلة ..
لو هو ده العدل في مفهومكم .. ان الي خرب مصر و وداها في داهية لسنين يطلع براءة ( عشان كان بيسرق قانوني ) .. و الي مستعد يضحي بحياته للبلد يتمسك .. يبقي ملعون العدل مش عايزينه ..
*بصوا .. انا تقريبا من سنة و نص مش متفق مع 6 ابريل ولا سياساتها و حاسسهم بيهبلوا بس ده ميخلنيش اتهمهم بالهري و العمالة .
* نفس الكلام بالنسبة لعلاء عبد الفتاح .. كثير بحس انه مش بيفكر قبل ما يتكلم و بيقول اي كلام .. بس برضه مقدرش اخونوا ولا ازايد عليه
* و موقفي من ماهر نفس الكلام و اكثر ..
عامة .. توزيع الاتهامات علي شاشات التليفزيون علي كل معارض او رأيه مختلف عنك بيثبت ان مفيش قانون في البلد اصلا .
نصيحة بقي . عايز تحس ان فيه حد بيعمل دوره كأعلامي .. اتفرج علي محمود سعد ...عايز تفهم اي موقف من غير تحيز لوجهة نظر معينة اتفرج علي يسري فوده .. بس خلاص .

طالب ثانوي و العربي !!

انا طالب ثانوي .. زيي زي كل الطلاب , بنسعي نجيب اعلي مجموع عشان ندخل احسن كلية ممكنة _حتي لو مش عايزين نشتغل في المجال ده_  .. ( لي رأي ثاني في حوار الشغل و المجموع و الكلام ده بس مش موضوعنا ) عامة .. اصعب مشكلة بتواجه طالب ثانوي هي مادة العربي , و دي لوحدها شئ مفزع ان تكون لغتك هي اصعب شئ بتدرسه , فكرت و قلت اشوف العربي صعب في ايه ؟؟  ففكرت كدة في جزء النصوص ... 
انا بحب اكتب  شعر من وانا صغير ( حتي لو اي كلام ) بس بحس ان هي دي انسب وسيلة بالنسبة لي بعرف اقول بيها افكاري و ارائي بطريقة منظمة , و بحب اقرأ شعر , لكن مش حابب اعرف اسباب الخناقات بين الشعراء مثلا , ولا ليه النقاد ( السخفاء علي اقل تقدير ) مش عجباهم القصيدة , منهج النصوص في العربي عبارة عن كمية من الهري اللي بيتقال علي قصائد لشعراء عظماء , انا حابب كطالب اقرأ القصيدة و اقرر ايه اللي عجبني فيها و ليه شايف الشاعر مبدع في الجزء ده.. و ليه شايفه مش مقنع في جزء ثاني , حابب اتفاعل مع القصيدة , مع العلم ان كتاب العربي بيدي ايحاء ان الشعر عبارة عن كلام " مجعلص "  _ملقتش لفظ مناسب اكثر من كدة :)_  و مقياس الشاعر الناجح زمان اختلف كثير دلوقتي , زمان كان الشاعر العبقري المبدع هو اللي يحاول يختار الفاظ و معاني لم تخطر علي بال شاعر ثاني , انما حاليا , الشاعر المبدع الناجح , هو اللي بيعرف يقول هموم الناس و مشاعرهم بطريقة منظمة جميلة تحسسك بموسيقي فعلا ,  عشان كدة العربي اصعب مادة 
لأن موضوعاته بشكل عام منحصرة في اتجاه واحد غبي .. و خصوصا النصوص . 
فكرت برضه ازاي ممكن نخلي النصوص ممتعة اكثر ؟؟ او مفيدة بمعني اصح . 
لقيت انه ببساطة مش لازم ندرس جزء واحد من الشعر  , - كلامي مش معناه اننا نهمل تراثنا وننسي الشعراء الكبار - بس قصدي ندرس قصائدهم بطريقة ابسط من كدة , مكانش هدف الشعراء ان الناس تقعد تفصص بيت بيت وتطلع اسوأ و احسن ما فيه .. انما كان هدفهم يعبروا عن حالتهم أو حال البلد او ايا كان من خلال شعرهم  بس للأسف النقاد و واضعي المناهج بيبتدوا يعقدوا في الموضوع 
ليه برضه ماينفعش ندرس شعر معاصر شوية - زي نزار مثلا او احمد مطر او جبران او .... - ليه ماندرسش شعر عامي جنب الفصحي .. ليه مانتعرفش علي انواع شعر مختلفة ؟!  
لما بقول بسطوا النصوص .. انا بس بطالب انكوا ترجعوها لأصلها و لهدفها الاصلي اللي المدرسين نسيوه , بسطوا النصوص و احذفوا اراء النقاد العقيمة اللي بتحبس الشاعر في سجن الالفاظ المحددة , يا مسئولين ايا كانت اتجاهاتكم , خلوا الطلبة يوسعوا من خيالهم  مش بس يحفظوا تعليقات و اراء علي البيوت الشعرية  , ازاي مستنيين يطلع  شعراء و ادباء من طلاب مصر بعد ما تكرهوهم في لغتهم ؟!  مستني ليه من واحد زيي بيحب الشعر انه يتعمق في دراسة اللغة لما انت حصرت الشعر في اراء محددة ,  افهموا الطلاب و اسمعوهم  ناقشوهم حتي يخرج لكم من وسطنا ادباء و شعراء و  مبدعين .

خازوق التربيه و التعليم فى ثوبه الجديد ..

أنا حاليا طالب فى تانيه ثانوى .. و ده معناه أنى من الدفعه المحظوظه بنت المحظوظه اللى مطبق عاليها الأتى :

1-  سنه سته أبتدائى

2-  أول دفعه يجرب عليها نظام " البورتفوليو " فى أعدادى

3-  أول دفعه يجرب عليها المناهج الجديده فى الصف الثالث الأعدادى

4-  و أخيرا و ليس أخرا .. نظام الثانويه العامه الجديد .. و هو ده بقى اللى عايزكوا فيه

صرح مصدر من وزاره التربيه و التعليم الأتى :

فى أجتماع مغلق تمت مناقشه تحويل نظام الثانويه العامه من نظام الشهاده المؤهله اللى نظام الشهاده التامه و يتكرم الظالب بعد الشهاده الثانويه بعمل اختبار قدرات للالتحاق بالجمعة المناسبه – أتفضل يا حسين – و هذا النظام سيتم مناقشه فور أنتخاب مجلس الشعب و تطبيقه على الدفعه الحاليه.

الكلام ده فى ما معناه أن ثانويه عامه هتبقى عمله زاى تالته أعدادى كده بظبط الطالب مننا يجيب 60% و يدخل هندسه

هيروح يعمل أختبار قدرات و لو نجح يدخل هندسه لو منجحش و معرفش يدخل هندسه يبقى قدامه 5 سنين على أنتهاء جوده الشهاده الثانويه بتاعتوا و فى خلال الخمس سنين ممكن يقدم فى الكليه اللى هو عايزها و لو عدى خمس سنين من غير ما يلتحق باى كليه هيضطر يعيد ثانويه عامه تانى و يجدد الشهاده

ده كلام حد من الوزاره إياها .. يعنى بذمه اللى جابوكو ده كلام .. أبوس ايديكوا أرحمونا أحنا زاى ولادكوا

و ده بقى معناه كذا حاجه .. يا اهلا بالوسايط .. يا أهلا بالمعاناه .. يا أهلا بالذل اللى هيذلوا بيه الطالب ..

الكلام من برا جميل و أن هيلغوا ثانويه عامه و الضغط النفسى بتاعها بس كده محدش هيدخل كليات القمه غير اصحاب الوسايط و أولاد الدكاتره فى الكليات و ولاد الوزراء .. يعنى لو النظام ده أطبق ممكن أبن مرسى يعيد ثانوى و يدخل هندسه ..

القرار ده لو أطبق فعلا أبقوا سلمولى بقى على التعليم و التفوق و الكلام ده كلوا ..

عارف يعنى أيه .. العلمانيه !

بعد الثورة .. بقي في ظاهرة واضحة اوي كلنا اخدنا بالنا منها ، ان كل الناس بتتكلم في السياسة ، بالنسبة ليا الظاهرة دي صحية جدا و مفيدة جدا ، بس بحر السياسة واسع اوي و  هنلاقي فيه مصطلحات  متكررة كتير علي لسان  السياسيين و معظمنا للأسف مش بيبقي فاهم المصطلحات دي او علي الاقل فاهمها غلط فقررت ادور في معاني الكلمات دي  عشان مايتضحكش عليا باي كلمتين من اي حد عامل نفسه فاهم يقولهم لي ، هنقول هنا معاني بعض من الكلمات دي الاصلية و مش من وجهة نظر اي اتجاه سياسي ، فقط معناها الاصلي ببساطة و من غير تعقيد


*ملحوظة : مش copy paste من ويكيبيديا

هانبتدي بكلمة علمانية :

في ناس رابطة المصطلح ده بمن ليس لهم دين او الكفرة ، لكن معني الكلمة الحقيقي ملوش اي علاقة بديانة الانسان ،
العلمانية او secularism اصطلاح يعني فصل الدين و المعتقدات الدينية عن السياسة و عدم التمييز بين المواطنين علي اساس الدين و عدم جبر اي مواطن علي اعتناق ديانة محددة ، العلمانية مش ضد الدين زي ما الاغلبية فاهمة ، انما هي منهج علمي يوفر الحرية للوطن و المواطن و من الدول اللي بتحكم بالنموزج ده تركيا .


فيه دول بتكتب في دستورها بشكل صريح ان هويتها علمانية ذي كندا و فرنسا و امريكا.

و فيه دول مابتكتبش في دستورها علمانية بس ماشية بمبادئها زي العدالة و المساواة و عدم التميية فبتعتبر دولة علمانية
و هناك شريحة اخري من الدول تنص دساتيرها علي دين معين للدولة زي مصر و اليونان بس برضو دساتيرها تحوي مبادئ العلمانية العامة.

العلمانية مصطلح عليه اختلافات من الباحثين فشوية منهم اقترح تعديل الاصطلاح لدولة مدنية و فيه اللي قال تعديل جملة "فصل الدولة عن الدين" ل "حياد الدولة تجاه الدين"

طيب عامة العلمانية هي مبادئ تنص علي الحرية و المساواة باختلاف العقائد الدينية  و هي ليست نظاما للحكم زي نظام برلماني او رئاسي بس هي مبادئ ماشية عليها الدول باختلاف نظم الحكم فيها.


*كل يومين تقريبا هانحط معني جديد لمصطلح سياسي بنسمعه كتير و مش فاهمين معناه بالظبط  , لو فيه اي مصطلح او كلمة مش فاهمها .. اكتبها في كومنت و احنا هاننزلها المرة الجاية . 

ملخص عصر النهضه

ابتدى عصر النهضه بواحد فاتح صدره و مش لابس واقى –(( واقى ضد الرصاص ياعنى علشان محدش يفهم غلط)) – و قال أنا مش محمى و بحبكوا و ادانا مشروع ال100 يوم .

قعدت الأيام تجرى تجرى يوم ورا التانى و أكتشفنا أن بعد ال100 يوم النتيجه كانت صفر و أقل من الصفر

البطاله زادت .. أزمه سولار .. أقتصاد بينهار .. و غلى الدولار – (( والله تنفع مطلع أغنيه .....ما علينا)) –

قولنا ننزل نطالب بقى بحقوقنا .. أصلنا أنتخبنا مرسى علشان نعرف نعارضه و أن بيننا و بين شفيق دم  لكن بينا و بين مرسى حلاوه سبريد شوكلاته ودة كان  ((خازوق الأنتخابات المرير .. أشهر كدبه ف 2012))

أضربنا فى التحرير .. أضربنا عند الأتحاديه .. شهداء و دم فى الشوارع بس أيه تعالوا نقلب المواجع و نكتبها بالتفصيل

أبتداها الخروف الكبير بتعنا بلجنه هلاميه لوضع الدستور – ((بعد أنسحاب 50% من أعضائها)) – و علشان محدش يعرف يتكلم راح مطلع أعلان غير دستورى يحمي فيه اللجنه و يمرر الدستور

أحنا كمعارضه مقدمناش غير الشوارع و الميادين ننزل فيها فروحنا عند قصر الأتحاديه و تانى يوم .. المأساه, كالنا ضرب لحد ما قولنا يا بس و طلع الباشا و قعد يقول قله مندسه و(( بلاه بلاه بلاه -  كلمه الرئيس أياهة)) –

مسكتناش طبعا عن حقوق الناس اللى أتعورت و ماتت عند الأتحاديه .. ((أيه ده أحنا سكتنا !! طيب))

بعدها حادثا القطر .. لأا مش الأقطر اللى أنفصل و أتقلب بالجنود .. ولا اللى خبط تاكسى و موت عيله بحالها .. أيواااا القطر اللى خبط أتوبيس أطفال و راح ضحيه 50 طفل و كان فى عائلات كامله يعنى الأم تودى ولادها المدرسه تصحى مفزوعه على خبر موت ولادها كلهم .. و الرد المعتاد كان : " أيه اللى وداهم هناك "  -(( بهزر طبعا)) .. دول دفعوا 5 ألاف جنيه على كل طفل مات ..(( و نعمه الأخلاق ))

ندخل بقى فى مرحله السحل .. أيوه هو حماده المصرى

الراجل ده على حسب كلامه الأولانى أنه نزل يشترى لبس لبنته و بالصدفه الباحته قرب من الأتحاديه فالقى عيال ثوار بيهجموا الرئيس فحب يدافع عن الرئيس حبيبه فالثوار ضربوه و كانت الشرطه بتحميه من الثوار راح ت هدومه أتقطعت

سيبك من كل ده .. أحنا المصريين عملنا أيه !! سبنا البنات اللى أغتصبت و أضربت و سبنا الناس اللى ماتت و سبنا الأخوان اللى ضربونا و سبنا كل ده و مسكنا فى واحد بالصدفه أتصور و هو بيتسحل و بيضرب

معلومه* : موقعه الأتحاديه أتعرى فيها أكتر من 40 شاب و أطربتوا فى الشجر و أضربوا بس للأسف مكانش فى حد يصورهم فا سيادتك متأثرتش !!

معاومه كمان* : فى سجن الجبل الأحمر و معسكرات الأمن المركزى المعتقلين بتتعرى و بتغتصب –(( أه الرجاله بتغتصب هناك)) – و بتضرب بس للأسف برضو مكانش فى حد يصورهم زاى البطل حماده

أنا مش بقلل من الموقف اللى حصل بس أحنا سبنا كل حاجه و مسكنا فى حماده

نسبنا بقى من الرجاله و ندخل على البنات اللى جزمهم برقبه أى خروف أخوانى مد أيده على أى وحده

من أول التكميم للأغتصاب لحد البنت اللى أضربت عند مكتب الأرشاد اللى فى المقطم –(( محظوظه برضه فى حد صورها)) – بس اللى أضرب غيرها كان أكتر و الشتيمه و قله الأدب

أنا معنديش كلام تانى أوصف بيه اللى حصل و اللى بيحصل و اللى هيحصل

بس طول ما أنت ساكت و مش فالح غير أنك تعمل شير لبوست أو صوره و تلفزيون و ملاكش دور فعلى فى المطالبه بحقك و حق غيرك هتفضل الخرفان تحكم و الخرفان مش بتحكم حد غير اللى يوطى راسه و يبقى خروف زيها

Message Delivered .. 

شاهد بالفيديو قبل الحذف : .. ( الأوشاعه )

كام مره و أنت صغير كان نفسك تروح السينما و أمك موافقتش علشان بيركبوا ابر فيها فيروس الأيدز  !!

كام مره كان نفسك تجيب كيس شيبسى زى اصحابك و معرفتشعلشان أمك منعاك و قالت لك " أصله بيجيب سرطان "

أحب أعرفكوا على السبب الرئيسى لأنتحار نص البنات !!اشاعه مقتل مهند على يد شاب أثناء زيارته لمصر

الأشاعه ببساطه تتلخص فى الأتى .. " موقف أوحدث ملوش مصدر بينتشر أسرع من الأنفلونزا فى عز الشتاء و لم يجد له العلماء دواءحتى الأن " و ده التحليل الشبه العلمى لما يسمى :" الأشاعه " .


فيه ناس فاضية .. كل هدفها في العالم انها تقرف باقيالبني ادمين , الناس دي هي اللي بتصتنع الاشاعات .. انا كطالب عندي 18 سنة و جيليعامة الاشاعات اثرت في حياتنا بشكل كبير.. 
مثلا , كنا نلعب بالبوكيمون فيطلع يقوللك بيجيب سرطان .. نحب الاندومي .. فيقول لك بتجيب سرطان برضه .. دي الاشاعةالاكبر , عايز تخلص من اي حاجة منتشرة قول بتجيب سرطان ده غير الفيران في مصنعالشيبسي.

و كتيير من الاشاعات و الموضوع ماوقفش هنا بس تطور بشكل كبييييييير .. بقياي حد زهقان يطلع له اشاعة عن اي حاجه في الدنيا ..

زي مثلا وفاة عادل امام -الاشاعة دي بتطلع كل 10 ايام تقريبا – ..
شاهد بالفيديو وفاه حسنى مبارك أوالفنانه صباح,
بس أحب أقولوكوا معلومه صغيره .. الأتنين دول بالذات عمرهم ماهيموتوا.

عامة صناع الاشاعات دول بيتقسموا لأتنين , يا اماناس فاضية بتلعب و بتهرج و غالبا بيبقوا مهيسيين و قاعدين على القهوه فواحد يفتى وبالصدفه 2 رجاله – المفروض عقلين يعنى – يسمعوا و ينقلوا اللى سمعوه لمراتاتهم والموضوع ينتشر ..
يا اما بتبقي اشاعة منظمة مقصودة من منافس علي منافس تاني في ايمنتج او منافسين سياسيين بيطلعوا اشاعات علي بعض او اي منافسين في اي مجال .. والمشكلة الكبري .. ان احنا بنصدق الاشاعات دي و بننقلها بسرعة غريبة 

..و دول أهم أشاعات تنلقلتها الأجيال و السنين :
ملحوظه* : ممنوع الضحك الهستيرى علشان الناس صدقت الموضوع ده فعلا.

1. فيروس خطير طورته اسرائيل ينتقل عبر شبكات المحمول فى شكل مكالمه هاتفيه أرقامها ملونه.
2. أسرائيل تطور غاز بلا لون ولا رائحه يقتل الفتيات و ينتقل عبر شبكات الأنفاق.
   
3. الحكومه تضع ابر فى مقاعد السينما لتنقل الأيدز.
   
4. شاهد بالفيديو : هروب صدام اللى المكسيك.
5. حسنى مبارك توفى من 5 سنين و قام شبيه له بأنتحال شخصيه الرئيس لأداره أمور البلاد.
6. ترشح الفنانة هياتم لرئاسه الجمهورية.– الموضوع ده أتنشر على الأهرام و الموضوع كبر بشكل هستيرى -

و من كده نستنتج كذا أستنتاج مهم .. 

اسرائيل عمللنا عقده غريبه و الحكومه عمللنا عقده لدرجه أننا افتكرناهم كائنات فضائيه

و أن أهم 3مصادر للأشاعات الفيسبوك و تويتر و أمك اللى فى البيت – معلش يا حجه بس مش كل حاجهبتجيب سرطان -

دول كانوا أهم أشاعات أنا سمعتهم و ضحكت عليهم و أمىضحكت عليهم و عم أحمد البواب ضحك عليهم ..

ضحكنا من تفاهة الكلام بس للأسف ناسكتير بتصدق أى حاجه بتسمعها أو اى حاجه بتتقلها

المطلوب مننا ان احنا ما نبقاش وسيلة في ايد واحداهبل قرر يصنع اشاعة ..

ما تعملش شير لأي بوست بيحذر الناس من اي حاجة ..

و نداء عاجل للصحفيين الجداد : أبوس أيدك أتأكد من الخبر قبل متنشره مش تجيبلى تويتات ولابوستات من الفيسبوك و تويتر و تعمل عليها سبق صحفى

نفكر شوية في الموضوع عشان فيه حاجات بتخرج عن حدودالمنطق .. !!!!!نفكر بس .. !!!

اللى عنده أشاعه سمعها قبل كدهو موتته من الضحكياريت يكتبها تحت فى كومينت الحاجات دى أصلها لازم تتأرخ .. 

شكرا.

الكائن البيضحباطي ..

كل شخص جواه كائنين عايشين , كائن دايما بيشجع و بيحلم و كائن تقدر تقول عليه بيضحباطي .. دايما هتلاقي ان الكائنين دول في صراع جواك ,
لو ده اقنعك بحلم كبير هتلاقي البيضحباطي بيقول لك  : يا عم مد لحافك علي قد رجليك   
و مثلا لو الكائن الاول اقنعك بفكرة مجنونة او جديدة تعملها .. هتلاقي البيضحباطي قال لك : يا عم فكك مش هاتعرف ..
و دايما بيبقي كلام الكائن التاني اللي ممكن اسميه لزج برضه .. دايما بيبقي كلامه مقنع و تأثيره سريع عشان اغلب كلامه بيبقي منطقي .. دايما اللي بيمشي علي كلام الكائن البيضحباطي اللي جواه بيعيش عيشة تقليدية جدا مفيهاش اي جديد ..
مفيش حد قدر يوصل لهدفه او عايش حياة سعيدة و ناجحة الا لما تخلص من الكائن اللزج البيضحباطي اللي جواه , قدامك حل من اتنين : يا اما تنمي و تكبر الكائن الاول عشان يقدر يغلب الكائن اللزج و يقنعك بسهولة
يا اما تقتل الكائن البيضحباطي اللزج اللي جواك ده وانا مع الحل التاني .. انك تقتله لأنه عمره ما هايكون له فايده غير انه يعكنن عليك  , او قدامك حل اصعب ثالث .. انك تغلبه بنفس اسلوبه اللي هو المنطق ..  وده الحل الاصعب
الموضوع مش صعب .. احلم اسرح بخيالك و فكر .. عيش الفكرة و صدقها , خطط لمستقبلك و اهم حاجة اعمل اللي عليك عشان تحقق الحلم و الفكرة .. عشان ماتفضلش طول عمرك عندك حلم علي الورق بس ! احيانا لو قلت لحد عن حلمك الكبير هايتحول هو كمان بقدرة قادر الي كائن بيضحباطي تاني يعكنن عليك , فكك منه و كمل حلمك للأخر .. و حاول تنشر عدوة الفكرة والحلم لكل اللي حواليك .. الفكرة بتبتدي بضحكة و تخيل و بتنتهي علي ارض الواقع .

احــــلم , اخـــلق الفكرة , غوط و عيـــش
اصل الحلم ما بيمتش و الفكرة مابتنتهيش

مبعوث من زحل

تخيل نفسك انك مع كائن فضائي و هيسألك شوية اسئلة*

كنت امشي مع صديقي البشري .. في شارع من شوارع هذا الكوكب الغريب .. شفت ابراج و قصور .. استغربت من الرفاهية اللي عايش بها الانسان .. ثم فوجئت  بشخص ينام علي رصيف المشاة,
فسألت صديقي البشري : ايه الشخص العبيط ده ؟!  سايب كل البيوت و الشقق الفاضية و نايم علي الرصيف !؟
فرد علي : هو ما يمتلكش واحدة منهم ..

فزاد اندهاشي : ليه لا يمتلك واحدة .. هو عاجبه النوم في الشارع ؟! ,

نظر صديقي الي بنظرة من السخرية و قال لي : ينقصه شئ اسمه الفلوس ..
ففهمت بسرعة انه ضيع هذا الشئ المسمي بالفلوس و هو دلوقتي بينام علي الرصيف كعقاب له..
فقاطعني صديقي : هو عمره ما كان معاه اصلا فلوس!!
انا : و ليه مش معاه
هو : عشان مش بيشتغل
انا : و ليه مش بيشتغل ؟
هو : عشان مفيش شغل .. و متسألش ليه عشان كدة مش هانخلص
انا : طيب .. ايه ده ؟؟ فيه واحد هناك بياكل من الزبالة
هو : اه عادي
انا : عادي ؟ طب سيبني اتوقع  .. ده جعان .. و مش جايب اكل عشان مش معاه فلوس و مش  معاه فلوس عشان مبيشتغلش .. و  مبيشتغلش عشان مفيش شغل ..
هو : عليك نور .. انت ابتديت تفهم كدة
انا : طب وريني كدة الفلوس اللي كل الناس دي متبهدلة عشان مش معاها منها
هو : اهي يا سيدي
انا : ايه ده شوية ورق ؟! يعني انتوا عندكوا هنا اللي مش معاه شوية الورق دول ملوش حق ياكل او يشرب او ينام ؟ حتي لو فيه انسان تاني معاه فلوس زيادة ممنوع يديله .. حتي لو حد عنده شقق فاضية ماينفعش يديها لحد ينام فيها الا لما يبقي معاه فلوس .. و لو حد عنده اكل زيادة بيرميه مش بيديه لحد مش عنده .. يعني ببساطة انتوا بتتحكم فيكوا شوية ورق .. اللي معاه الورق ده ينام و ياكل و يشرب  و اللي مش معاه يموت مع انه حي !!  انا راجع زحل يا عم انا مليش قعاد هنا ..
هو : ياللا في داهية  هو احنا ناقصين بلاوي !! !!! 

ببساطة .. احنا سايبين شوية ورق يتحكموا فينا ..  سايبين الفلوس تتحكم في ضميرنا ..

الكاشير

عايز تعرف شخصيه الناس اللى حواليك و طريقه تعاملهم مع البشر اللى حواليهم بطريقه بسيطة و سهله و مش مكلفه .. ببساطه أتبع الخطوات الأتيه :1- دور على أى سوبر ماركت فى منطقة شعبيه شويه
2- أدخل المحل و هات باكو لبان كلورتس3- دور على الكاشير و حاول تدفع ال 2 جنيه و تخرجالخطوات سهله جدا بس هتعرفك كتير ..

طريقة الناس عند الكاشير هى بجد المعدن الحقيقى للى قدامك .. يعنى مثلا: لو اللى قدامك طلع المحفظة و دفع بCredit Card  أكيد ده راجل غنى
لو دفع الفلوس بظبط أعرف أنه على قد حاله شويه
بس مش ده المهم .. أنا بتكلم على الشخصيه نفسها و تعاملها مهع اللى حوليهاهتلاقى عندك أنواع كتيييييييييييير أوى
مثلا اللى بيقف فى مكانه و مبيعديش حد ولا حد بيعديه .. ده تقدر تقول عليه منظم و محترم بس معندوش ذوق ولا أتيكيت علشان ممكن يكون في وراه راجل عجوز واقف أو أم محتاسه بأبنهافى نوع بقى و النوع ده أنا بحبه و بحترمه جدا .. النوع ده بيقف مكانه و مبيتكلمش ممكن يلقى واحد عداه فبيبص و يضحك و يقوله أتفضل أو يشوف ست عجوزه و يقولها أتفضلى يا حاجه و مش بعيد يشلها الشنط و يرجع يقف مكانه و النوع ده بيبقى ابن ناس و متربى و ذوق .. و للأسف النوع ده شبه أنقرض و مبقاش فيه منه كتير و لو شفته طلع موبيلك و أفتح الكاميرا و أتصور معاهنيجى بقى للموديل المصرى الأصيل .. و ده بقى أولا: بيقعد يطنطط من صف للصف و ينقى أقصر واحد و يقف فيه و متبقاش عارف هو مستعجل ليه .. ثانيا: يجى يحاسب لازم يعترض على الفكه مع أنه كده كده هيفك من الكشك علشان يروح بيتهم و أخيرا و ليس أخرا لازم و هو ماشى ياخد يجى سبع تسع أكياس زياده من بتوع السوبر ماركت – علشان العيش طبعا - .. و ده النوع العام اللى أحنا معظمنا منه بس بتفاوت الصفات فيه يعنى بتعمل حاجه زياده حاجه أقل بس مينختلفش كتير
نيجى بقى للنوع الغريب المريب و بأختصار النوع " البيضحباطى "  .. و ده بقى مفيش حد فيكى يا بشريه متعاملش معاه و ده لازم أحكيلكوا قصته ,, فى مره و أنا واقف عند الكاشير كنت واقف و قدامى 3 لقيت واحد ست معاها حجات كتير و وقفه ورايا و أنا كان معايا ربع كيلو حلاوة .. أقعدت الست دى تتسحب تتسحب تتسحب و تحط العربيه قدام و أنا فاهم و ساكت راحت وقفت قدامى قولت عادى مفيش مشكله دى ست كبيرة و لازم أحترمها و خدتها من قصرها و رحت فى صف تانى .. الصف تانى كان قدامى واحد لقيت نفس الست سابت صفها و جت ورايا و عملت جمبى صف و جيه 3 وراها و انا ساكت راحت زقانى و قالتلى أحترمنا و أرجع ورا و خليك متحضر !! فا بقلها أنا واقف قبل حضرتك راحت بمنتهى الحكمه و الذوق ردت و قالت : " أنا كنت وقفى قدامك فى الصف التانى فأحترمنى و أقف ورا " .. و هو ده النوع البيضحباطى ببساطهأنا ممكن أبقى شاب و معنديش مشاكل أقعدى الناس كلها بس في ذوق فى أنسانيه فى حاجه أسمها أحترم الصف أنت مش احسن من غيرك .. الأتيكيت و المجاملات حلوة بس مش عافيه

و ده بيأكد حاجه أنا مقتنع بيها أوى" البشر درجات من أول أقل درجه و دى قريبه من الحيوانات لحد الطبقة الراقيه .. لو حسيت أن انت فى مكان و البشر اللى فيه من طبقة قليله حاول تبعد و دور على حته فيها بنى أدمين مش حيوانات تتعامل معاهم "

و دى كمان مقوله لهتلر : " لا تجادل أحمق .. فقد يخطئ البعد فى التفريق بينكم "

بورسعيد مجددا !!

بورسعيد عايزه توصل رساله : " أحنا مش هناخد على قفانا يا مرسى "

بورسعيد ببساطه جابوا بلالين الكبيره بتاعيت الأفراح دى و حطوها على ممشى الممر الملاحى

و حطوا عباره (  S.O.S ) على كل واحده 

عايزين يفضحوا نظام و يعروه قدام كل الدول لأان أى سفينه هتعدى هتشوف الكلام ده

بورسعيد رجاله يا نظام جبان .. 

بورسعيد رجاله يا مرشد الخرفان .. 

بورسعيد رجاله يا رئيس النهضة ..

بورسعيد رجاله يا أخوان ..

مصدر الصوره : http://www.facebook.com/x.fra3in

لحمه للبييييييع ...

أتفضل يا باشا أتفضل يا بيه .. لحمه الغلابه .. لحمه مدعمه يا باشا ..عندنا و بس كيلو اللحمه ب10 جنيه

وصل الحال بالأخوان أنهم يدبحوا حمير و يبعوها للغلابه اللى مش قدرين يشتروا اللحمه

بيبيعوا لحمه الحمير للغلابه على أنها لحمه بقرى و ب10 جنيه مدعمه من حزب الحريه و العدالة – عشانالأنتخابات طبعا –

و يعينى المواطن الغلبان يجيب كيلو اللحمه علشان يفرح ولاده و يأكلهم لحمه فى يوم غير العيد.

ده مش سفاقا ولا عدم ضمير ولا عدم أنسانيه ولا سرقه ولا غش ولا أيى حاجه من المسميات دى.

دول " أخوان كاذبون "

المصدر : W.N.N ( جريده الوطن )